تربیلا ڈیم میں پانی کی سطح مسلسل بلند ہونے کے بعد ڈیم اپنی مجموعی گنجائش کے 95 فیصد تک بھر گیا ہے۔ حکام کے مطابق ڈیم میں پانی کی موجودہ سطح 1545 فٹ تک پہنچ چکی ہے، جو اس کی زیادہ سے زیادہ ذخیرہ گنجائش 1550 فٹ سے صرف 5 فٹ کم ہے۔
اعداد و شمار کے مطابق گزشتہ سال 5 اگست کو تربیلا ڈیم 94 فیصد بھرا ہوا تھا، جبکہ رواں سال پانی کی آمد میں اضافے کے باعث ذخیرہ مزید بڑھ گیا ہے۔
ڈیم انتظامیہ نے پانی کی بڑھتی ہوئی سطح کے پیش نظر 5 اگست کی صبح سے سپل ویز کی پوزیشن تبدیل کرنے کا فیصلہ کیا ہے۔ نئی ترتیب کے بعد سپل ویز سے 2 لاکھ 60 ہزار سے 2 لاکھ 90 ہزار کیوسک پانی خارج کیا جائے گا تاکہ ڈیم میں پانی کی سطح کو محفوظ حد میں برقرار رکھا جا سکے۔