پنجاب کے پراسیکیوٹر جنرل عرفان صادق تارڑ نے ذہنی معذور لڑکی سے مبینہ زیادتی کے مقدمے کو ہائی پروفائل کیس قرار دیتے ہوئے کہا ہے کہ اسے ٹیسٹ کیس کے طور پر چلایا جائے گا تاکہ مؤثر تفتیش اور مضبوط پراسیکیوشن کے ذریعے ملزمان کو قانون کے مطابق سزا دلوائی جاسکے۔
نجی ٹی وی سے گفتگو کرتے ہوئے عرفان صادق تارڑ نے واقعے کو انتہائی افسوسناک قرار دیا اور بتایا کہ تفتیشی افسر کو مقدمے کا مکمل ریکارڈ سمیت طلب کرلیا گیا ہے۔
انہوں نے کہا کہ پراسیکیوشن ٹیم تفتیشی افسر کو شواہد جمع کرنے اور تحقیقات کے مؤثر طریقہ کار سے متعلق واضح رہنمائی فراہم کرے گی تاکہ مقدمہ مضبوط بنیادوں پر استوار ہو اور سزا کے امکانات بڑھ سکیں۔
پراسیکیوٹر جنرل کا کہنا تھا کہ خواتین کے خلاف تشدد کے مقدمات پراسیکیوشن کے لیے ”ریڈ لائن“ کی حیثیت رکھتے ہیں اور ایسے کیسز میں کسی قسم کی رعایت نہیں برتی جائے گی۔ انہوں نے مزید کہا کہ محکمہ خواتین سے متعلق مقدمات کو ترجیحی بنیادوں پر نمٹا رہا ہے اور زیادتی و منشیات کے مقدمات میں سزاؤں کو برقرار رکھنے کے لیے مؤثر اقدامات کیے جا رہے ہیں۔
حکام کے مطابق واقعے کی تحقیقات جاری ہیں اور شواہد کی روشنی میں قانونی کارروائی آگے بڑھائی جائے گی۔