وفاقی حکومت نے ایک بار پھر پاکستان تحریک انصاف کو سیاسی مذاکرات کی دعوت دیتے ہوئے اختلافات کو بات چیت کے ذریعے حل کرنے پر زور دیا ہے۔
اس سلسلے میں پی ٹی آئی کے چیف وہیپ عامر ڈوگر نے اسپیکر قومی اسمبلی سردار ایاز صادق سے ملاقات کی، جس میں وفاقی وزیر برائے پارلیمانی امور ڈاکٹر طارق فضل چوہدری بھی شریک ہوئے۔
ذرائع کے مطابق ملاقات کے دوران حکومتی نمائندوں نے پی ٹی آئی کو مذاکرات کی باضابطہ پیشکش کرتے ہوئے کہا کہ پارلیمنٹ ہاؤس میں پی ٹی آئی کی تجویز کردہ جگہ پر بھی بات چیت کا انعقاد کیا جا سکتا ہے تاکہ سیاسی معاملات کو خوش اسلوبی سے آگے بڑھایا جاسکے۔
اس موقع پر وفاقی وزیر برائے پارلیمانی امور ڈاکٹر طارق فضل چوہدری کا کہنا تھا کہ ملک کو درپیش سیاسی چیلنجز کا واحد مؤثر حل مذاکرات ہیں۔انہوں نے کہا کہ حکومت کی جانب سے دعوت دی جاچکی ہے اور اب فیصلہ پی ٹی آئی کو کرنا ہے۔
ان کا کہنا تھا کہ وزیراعظم کی جانب سے اپوزیشن لیڈر کو مذاکرات کی دعوت پر تاحال کوئی جواب موصول نہیں ہوا، تاہم امید ہے کہ پی ٹی آئی اس پیشکش کو سنجیدگی سے لے گی اور مثبت پیش رفت ہوگی۔