وفاقی وزیر ریلوے محمد حنیف عباسی نے ریلوے پولیس کے کانسٹیبل سے اے ایس آئی تک کے پے اسکیلز کو دیگر قانون نافذ کرنے والے اداروں کے مساوی کرتے ہوئے اپ گریڈیشن کی منظوری دیدی ہے۔
ریلوے پولیس سے منسلک افسران اور جوانوں کا یہ دیرینہ مطالبہ تھا۔ نئے نوٹیفکیشن کے تحت کانسٹیبل کا اسکیل BPS-5 سے بڑھا کر BPS-7، ہیڈ کانسٹیبل کا BPS-7 سے BPS-9 اور اے ایس آئی کا اسکیل BPS-9 سے BPS-11 کردیا گیا ہے۔
آئی جی ریلوے پولیس نے اس فیصلے کا خیرمقدم کرتے ہوئے کہا کہ اس تاریخی پیش رفت سے فورس کے جوانوں اور افسران کا مورال مزید بلند ہوگا اور ان کی پیشہ ورانہ کارکردگی میں بہتری آئے گی۔
انہوں نے وزیراعظم اور وفاقی وزیر ریلوے کا شکریہ ادا کرتے ہوئے کہا کہ ریلوے پولیس آج ملک بھر میں مسافروں، عوام کے جان و مال اور ریلوے تنصیبات کی حفاظت کا فریضہ بہترین انداز میں انجام دے رہی ہے۔