راولپنڈی کی اڈیالہ جیل میں قیدیوں سے موبائل فونز برآمد ہونے کے معاملے پر کارروائی کرتے ہوئے تین قیدیوں کو اٹک جیل منتقل کردیا گیا، جبکہ غفلت برتنے پر پانچ جیل ملازمین کو معطل کردیا گیا۔
جیل ذرائع کے مطابق تلاشی کے دوران ٹریفک وارڈن کے قتل کیس میں سزا یافتہ راجہ رعد، محکمہ جیل خانہ جات پنجاب کے ملازم کے قتل کیس میں قید ملک حماد اور شازیب ولد اکرم سے موبائل فونز برآمد ہوئے۔
ذرائع کا کہنا ہے کہ موبائل فونز کی برآمدگی کے بعد تینوں قیدیوں کو انتظامی کارروائی کے تحت اڈیالہ جیل سے اٹک جیل منتقل کردیا گیا۔
قیدیوں تک ممنوعہ اشیا پہنچنے اور نگرانی میں غفلت برتنے کے الزام میں پانچ جیل ملازمین کو معطل کردیا گیا ہے، جبکہ معاملے کی مزید تحقیقات بھی جاری ہیں۔