خانیوال میں سلیپر فیکٹری کے لیے آئل لے کر آنے والی سپیشل مال گاڑی کی ایک بوگی انڈر پاس کے قریب پٹڑی سے اتر گئی، جس کے باعث ریلوے ٹریک پر ٹرینوں کی اپ سروس متاثر ہوگئی۔
ریلوے حکام کے مطابق سپیشل مال گاڑی سمہ سٹہ سے سلیپر فیکٹری خانیوال آ رہی تھی کہ انڈر پاس کے قریب اچانک اس کی ایک بوگی پٹڑی سے اتر گئی۔
واقعے کی اطلاع ملتے ہی ریلوے حکام نے ٹریک کی بحالی کے لیے ریسکیو آپریشن شروع کردیا، جبکہ ملتان سے ریلیف ٹرین بھی خانیوال روانہ کردی گئی۔
ریلوے حکام کا کہنا ہے کہ متاثرہ ٹریک کو جلد از جلد بحال کرنے کے لیے امدادی کارروائیاں جاری ہیں۔ بوگی کے پٹڑی سے اترنے کے باعث اپ ٹریک پر ٹرینوں کی آمدورفت عارضی طور پر معطل ہے۔