وفاقی وزیر دفاع خواجہ آصف نے میر رضا قتل کیس کے معاملے پر حکومتِ سندھ کو تنقید کا نشانہ بناتے ہوئے کہا ہے کہ کیس میں سامنے آنے والے نتائج اور حقائق سے بظاہر ثابت ہو رہا ہے کہ پورا نظام کمپرومائزڈ تھا۔
وفاقی وزیر دفاع کا کہنا تھا کہ اب بھی معاملے پر کڑی نظر رکھنا ہوگی، ورنہ ماضی کی طرح دوبارہ مک مکا ہوسکتا ہے۔ انہوں نے کہا کہ جن افراد نے معاملے کو چھپانے یا حقائق دبانے کی کوشش کی، انہیں بھی بے نقاب کیا جانا چاہیے۔
دوسری جانب حکومتِ سندھ نے میر رضا قتل کیس کی تحقیقات کے لیے جوڈیشل کمیشن تشکیل دینے کا فیصلہ کیا ہے۔
وزیر داخلہ سندھ ضیا لنجار نے کہا کہ حکومتِ سندھ چاہتی ہے کہ میر رضا کے اہلخانہ کو انصاف فراہم کیا جائے۔ ان کے مطابق معاملے کی تحقیقات کے لیے نئی کمیٹی بھی تشکیل دی گئی ہے، جبکہ مختلف رپورٹس میں سامنے آنے والے تضاد کا فیصلہ کمیشن یا عدالت پر چھوڑا جائے گا۔
انہوں نے کہا کہ حکومتِ سندھ معاملے کی شفاف تحقیقات اور حقائق سامنے لانے کے لیے اقدامات کر رہی ہے۔