کبیروالا کے نواحی علاقے موضع شکروالا قتالپور میں مبینہ خسرہ کے باعث ایک ہی خاندان کے تین کمسن بچوں کے تین روز کے دوران جاں بحق ہونے سے علاقے میں تشویش پھیل گئی۔
واقعے کی اطلاع ملنے پر محکمہ صحت کی ٹیمیں فوری طور پر متاثرہ علاقے میں پہنچ گئیں اور بچوں کی اسکریننگ کا عمل شروع کردیا۔
ڈپٹی ڈی ایچ او کے مطابق علاقے میں جامع اسکریننگ کے دوران مزید پانچ بچوں میں بیماری کی علامات پائی گئیں، جنہیں طبی امداد کے لیے تحصیل ہیڈکوارٹر اسپتال منتقل کردیا گیا ہے۔
محکمہ صحت کا کہنا ہے کہ متاثرہ بچوں کو طبی امداد فراہم کی جارہی ہے، تاہم بچوں کی ہلاکت کی اصل وجہ اور خسرہ کی حتمی تصدیق طبی معائنے اور ٹیسٹ رپورٹس کے بعد ہی ممکن ہوگی۔
حکام کے مطابق علاقے میں بیماری کے ممکنہ پھیلاؤ کو روکنے کے لیے نگرانی اور اسکریننگ کا عمل جاری ہے۔