بلوچستان کے ضلع سوراب میں سیکیورٹی فورسز کی کارروائی کے دوران مجموعی طور پر 18 دہشت گرد ہلاک جبکہ فائرنگ کے تبادلے میں پاک فوج کے 2 جوان زخمی ہوگئے۔
پاک فوج کے شعبہ تعلقات عامہ (آئی ایس پی آر) کے مطابق سوراب میں دہشت گرد بارود سے بھری گاڑی تیار کر رہے تھے کہ اسی دوران گاڑی دھماکے سے پھٹ گئی، جس کے نتیجے میں 8 دہشت گرد ہلاک ہوئے، جبکہ واقعے میں 3 شہری بھی شہید ہوگئے۔
آئی ایس پی آر کے مطابق واقعے کی اطلاع ملتے ہی سیکیورٹی فورسز نے علاقے میں مشترکہ کلیئرنس آپریشن شروع کیا۔ کارروائی کے دوران فرار ہونے والے دہشت گردوں کا سراغ لگا کر مزید 10 دہشت گردوں کو ہلاک کردیا گیا۔
ترجمان پاک فوج کے مطابق آپریشن کے دوران دہشت گردوں سے شدید فائرنگ کا تبادلہ ہوا، جس میں 2 سیکیورٹی اہلکار زخمی ہوئے۔
آئی ایس پی آر کا کہنا ہے کہ علاقے میں دہشت گردوں کی ممکنہ موجودگی کے پیش نظر کلیئرنس آپریشن جاری ہے، جبکہ غیرملکی حمایت یافتہ دہشت گردی کے مکمل خاتمے کے لیے سیکیورٹی فورسز کی کارروائیاں جاری رہیں گی۔