وفاقی وزیر صحت مصطفیٰ کمال نے اعلان کیا ہے کہ شناختی کارڈ بنوانے کے عمل کے ساتھ ہیپاٹائٹس سی کی اسکریننگ کو لازمی قرار دینے کی تیاری کی جا رہی ہے۔
اسلام آباد میں پریس کانفرنس کرتے ہوئے وفاقی وزیر نے بتایا کہ ہر شہری کی ہیپاٹائٹس سی کے لیے اسکریننگ کی جائے گی اور اس کا ریکارڈ نادرا کے ڈیٹا سے منسلک کیا جاچکا ہے۔ ان کے مطابق اسکریننگ کے لیے ضروری آلات بھی فراہم کر دیے گئے ہیں تاکہ ملک بھر میں اس عمل کو وسعت دی جاسکے۔
مصطفیٰ کمال نے کہا کہ وزارت صحت کے ملازمین کے لیے ہیپاٹائٹس سی ٹیسٹ پہلے ہی لازمی قرار دیا جا چکا ہے۔ جو ملازم ٹیسٹ نہیں کروائے گا، اس کی تنخواہ روک دی جائے گی۔ ان کے مطابق وزرا سمیت دیگر سرکاری ملازمین کی اسکریننگ بھی یقینی بنانے کے لیے تمام وزارتوں کو مراسلے ارسال کیے جا رہے ہیں۔
وفاقی وزیر صحت نے بتایا کہ پاکستان میں ایک کروڑ سے زائد افراد ہیپاٹائٹس سی سے متاثر ہیں۔ حکومت کے پی ایم ہیپاٹائٹس پروگرام کے تحت متاثرہ مریضوں کو تقریباً 68 ہزار روپے مالیت کی ادویہ مفت فراہم کی جائیں گی۔
ان کا کہنا تھا کہ اسلام آباد میں مفت اسکریننگ کے لیے 17 مراکز قائم کیے گئے ہیں، جبکہ نجی اسپتالوں کو بھی ٹیسٹنگ کٹس فراہم کی جائیں گی تاکہ ملک بھر میں زیادہ سے زیادہ افراد تک اسکریننگ کی سہولت پہنچائی جاسکے۔