مظفرگڑھ میں وراثتی زمین کے تنازع نے ایک اور گھر اجاڑ دیا، مظفرگڑھ میں بھائی نے 4 کنال زمین اپنے نام نہ کرانے پر 8 ماہ کی حاملہ بہن کو گولی مار کر قتل کردیا۔
پولیس کے مطابق مقتولہ ممتاز مائی ایک بچے کی ماں اور 8 ماہ کی حاملہ تھی۔ پولیس نے واقعے کا مقدمہ مقتولہ کی ساس کی مدعیت میں تھانہ جتوئی میں درج کرلیا ہے۔
ایف آئی آر کے متن کے مطابق مقتولہ اپنے بھائی کے لیے دکان سے کولڈ ڈرنک لے کر آئی جسے پینے کے بعد ملزم نے بہن سے زمین کی منتقلی کا مطالبہ کیا اور انکار پر فائرنگ کردی۔
مقتولہ کا شوہر محنت مزدوری کے لیے سعودی عرب میں مقیم ہے جبکہ ملزم کی گرفتاری کے لیے چھاپے مارے جا رہے ہیں۔