حکومت نے بانی پی ٹی آئی عمران خان کو شفا انٹرنیشنل اسپتال منتقل کرنے کے سپریم کورٹ کے حکم کے خلاف نظرثانی درخواست دائر کرنے کا فیصلہ کرلیا۔
وفاقی وزیر قانون اعظم نذیر تارڑ نے کہا ہے کہ عدالتی حکم کے بعض نکات جیل رولز اور مروجہ قوانین سے مطابقت نہیں رکھتے۔ ان کے مطابق کسی سزا یافتہ قیدی کو نجی اسپتال منتقل کرنے کی کوئی قانونی نظیر موجود نہیں، قانون کے تحت جیل سے باہر علاج کی ضرورت ہو تو قیدی کو سرکاری اسپتال منتقل کیا جاتا ہے۔
اعظم نذیر تارڑ کا کہنا تھا کہ حکومت نے قانونی ٹیم سے مشاورت کے بعد سپریم کورٹ سے حکم میں مناسب ترمیم کی درخواست کرنے کا فیصلہ کیا ہے۔ انہوں نے کہا کہ اگر کسی مخصوص طبی ماہر کی ضرورت ہو تو اسے میڈیکل بورڈ میں شامل کیا جاسکتا ہے۔
وزیر قانون کے مطابق نظرثانی درخواست کے ذریعے عدالتی حکم سے پیدا ہونے والے قانونی ابہام کو دور کرنے کی کوشش کی جائے گی۔