وفاقی دارالحکومت میں موسلادھار بارش کے باعث اسلام آباد ٹریفک پولیس نے شہریوں کے لیے خصوصی ٹریفک ایڈوائزری جاری کردی۔
ٹریفک پولیس نے شہریوں کو ہدایت کی ہے کہ بارش کے دوران گاڑیوں اور موٹرسائیکلوں کی رفتار کم رکھیں اور آگے چلنے والی گاڑیوں سے مناسب فاصلہ برقرار رکھیں۔ ڈرائیورز کو بارش میں فوگ لائٹس استعمال کرنے اور اپنی لین میں رہنے کی بھی ہدایت کی گئی ہے۔
ایڈوائزری میں کہا گیا ہے کہ ڈرائیونگ کے دوران سائیڈ شیشوں اور انڈیکیٹرز کا درست استعمال کیا جائے جبکہ گاڑی میں سیٹ بیلٹ لازمی باندھی جائے۔
ٹریفک پولیس کے مطابق موٹرسائیکل سوار انتہائی بائیں لین میں سفر کریں اور ہیلمٹ کا استعمال یقینی بنائیں۔ شہریوں کی رہنمائی اور ٹریفک کی روانی برقرار رکھنے کے لیے ٹریفک پولیس کے اہلکار مختلف شاہراہوں پر موجود ہیں۔
ٹریفک پولیس نے شہریوں سے اپیل کی ہے کہ بارش کے دوران غیر ضروری تیز رفتاری سے گریز کریں اور محفوظ سفر کے لیے ٹریفک قوانین پر عمل درآمد یقینی بنائیں۔