وفاقی حکومت نے ملکی سطح پر پولیس کی اعلیٰ قیادت میں بڑی انتظامی تبدیلیوں کا فیصلہ کرتے ہوئے پنجاب، سندھ، خیبر پختونخوا اور بلوچستان کے انسپکٹر جنرلز آف پولیس (آئی جیز) کو تبدیل کرنے کی منظوری دے دی ہے۔
اس سلسلے میں ایک اہم وفاقی وزیر نے اسٹیبلشمنٹ ڈویژن کو فوری کارروائی اور نئے افسران کے پینل تشکیل دینے کے لیے ضروری ہدایات جاری کردی ہیں۔
ذرائع کا کہنا ہے کہ اس فیصلے کے تحت وفاق اور صوبوں کے درمیان ہم آہنگی، لاء اینڈ آرڈر کی صورتحال میں بہتری اور پولیس آرڈر کے تحت اصلاحات کو نافذ کرنا شامل ہے۔
اسٹیبلشمنٹ ڈویژن نے اہم وفاقی وزیر کی ہدایات کی روشنی میں نئے پولیس چیفس کی تعنیاتی کے لیے موزوں افسران کے ناموں پر غور شروع کردیا ہے اور جلد ہی ایک سمری منظوری کے لیے وزیراعظم کو ارسال کی جائے گی۔
حکومتی ذرائع کے مطابق تبادلوں کے اس عمل کے بعد وفاق اور صوبائی پولیس کمانڈ میں بڑے پیمانے پر اکھڑ پچھاڑ کا قوی امکان ہے، جس کے اثرات دیگر سینئر پولیس افسران بشمول ایڈیشنل آئی جیز، ڈی آئی جیز اور ڈسٹرکٹ پولیس افسران کے تبادلوں کی صورت میں بھی سامنے آئیں گے۔
باضابطہ نوٹیفکیشن تمام قانونی اور انتظامی مراحل مکمل ہونے کے بعد جاری کیا جائے گا۔