قومی اسمبلی کے اجلاس میں اپوزیشن لیڈر محمود خان اچکزئی نے بانی پی ٹی آئی عمران خان کے طبی معائنے اور دوبارہ جیل منتقلی کے معاملے پر اظہارِ تشویش کرتے ہوئے کہا ہے کہ عمران خان کی بہن کو بھی اسپتال میں ایک الگ کمرے میں بٹھا دیا گیا۔
اسپیکر سردار ایاز صادق کی زیرِ صدارت قومی اسمبلی کا اجلاس ہوا، جس میں اظہارِ خیال کرتے ہوئے محمود خان اچکزئی نے کہا کہ ملک بھر میں یہ امید پیدا ہوئی تھی کہ سپریم کورٹ کے احکامات کے تحت بانی پی ٹی آئی کو شفا انٹرنیشنل اسپتال منتقل کیا جائے گا۔
انہوں نے کہا کہ رات گئے معلوم ہوا کہ عمران خان کو مبینہ طور پر خاموشی سے کسی دوسرے اسپتال منتقل کیا گیا، جبکہ ان کی بہن کو بھی اسپتال کے ایک دوسرے کمرے میں بٹھا دیا گیا۔
محمود اچکزئی نے کہا کہ دو روز قبل سرانان میں پیش آنے والے واقعے پر بھی کوئی مؤثر ردعمل سامنے نہیں آیا۔ ان کا کہنا تھا کہ حکومت اور تحریک انصاف کے درمیان معاملات بہتر بنانے کے لیے جب بھی مذاکرات اور ڈائیلاگ کی فضا بنتی ہے، بعض عناصر اسے خراب کر دیتے ہیں۔
اپوزیشن لیڈر نے الزام عائد کیا کہ حکومتی صفوں میں موجود بعض عناصر تحریک انصاف اور حکومت کے درمیان معاملات کو سبوتاژ کرنے کی کوشش کر رہے ہیں۔ انہوں نے کہا کہ وہ سمجھتے ہیں کہ سرانان میں پیش آنے والا واقعہ بھی حکومت کے اندر موجود ’’کالی بھیڑوں‘‘ کی کارروائی ہے۔
محمود اچکزئی کا کہنا تھا کہ بات چیت کے لیے سازگار ماحول بنتا ہے تو نامعلوم قوتیں اسے خراب کردیتی ہیں، جس سے سیاسی کشیدگی میں اضافہ ہوتا ہے۔