ایران کے سپریم لیڈر آیت اللہ مجتبیٰ خامنہ ای نے صدر مسعود پزشکیان کو امریکی معاشی دباؤ اور پابندیوں سے نمٹنے کیلئے مزاحمتی معیشت کی پالیسی اختیار کرنے کی ہدایت کردی۔
ایرانی سپریم لیڈر نے قومی اتحاد مضبوط بنانے، مہنگائی کم کرنے، مقامی پیداوار بڑھانے، درآمدات کم کرنے اور ڈالر پر انحصار بتدریج ختم کرنے پر زور دیا۔ ایران کی معیشت اس وقت امریکی پابندیوں اور جنگ کے باعث شدید دباؤ کا شکار ہے۔
مجتبیٰ خامنہ ای نے مشکل معاشی حالات میں عوام کی ضروریات پوری کرنے پر صدر پزشکیان کی حکومت کو سراہا۔
ایران نے نئی امریکی اقتصادی پابندیوں کو ریاستی دہشت گردی قرار دیتے ہوئے دیگر ممالک سے مطالبہ کیا ہے کہ وہ پابندیوں پر عمل درآمد سے گریز کریں۔
دوسری جانب صدر مسعود پزشکیان نے سعودی عرب، متحدہ عرب امارات سمیت خطے کے ممالک کے ساتھ تعاون کی پیشکش کرتے ہوئے بتایا کہ عبوری معاہدے کے دوران ایران نے تقریباً 9 کروڑ بیرل تیل فروخت کیا۔