پشاور میں پاکستان تحریک انصاف کے رکن خیبر پختونخوا اسمبلی فضل الٰہی کی ہدایت پر ان کے فوکل پرسن نے رحمان بابا گرڈ اسٹیشن میں داخل ہو کر متعدد فیڈرز زبردستی آن کروا دیے۔
ترجمان پیسکو کے مطابق عملے کو ڈرایا دھمکایا گیا اور اس دوران پیسکو اہلکار سے بدتمیزی بھی کی گئی۔ ترجمان کے مطابق زبردستی آن کروائے گئے فیڈرز میں یکہ توت، چنہ ڈاک، سوڑیزی بالا، قلندر بابا، اخون آباد، جمیل چوک، چیئرمین آفس اور شلوازن فیڈرز شامل ہیں۔
پیسکو ترجمان نے وضاحت کی ہے کہ رحمان بابا گرڈ اسٹیشن کے 80 فیصد فیڈرز ہائی لاسز کی زمرے میں آتے ہیں، جہاں بجلی چوری اور واجبات کی عدم ادائیگی کی وجہ سے قانون کے مطابق لوڈ مینجمنٹ کی جاتی ہے۔
ترجمان پیسکو کے مطابق انہوں نے خدشہ ظاہر کیا کہ ان ہائی لاسز فیڈرز پر زبردستی بجلی کی فراہمی بحال کرنے سے نہ صرف ادارے کے مالی نقصانات میں اضافہ ہوگا بلکہ نظام کو بھی شدید نقصان پہنچ سکتا ہے۔