آزاد کشمیر کے نومنتخب وزیراعظم بیرسٹر افتخار گیلانی نے خطے میں انٹرنیٹ سروسز اور اہم مواصلاتی راستوں کو اگلے دو ایام میں بحال کرنے کا بڑا فیصلہ کرلیا ہے۔
مرکزی ایوان صحافت کے اپنے پہلے سرکاری دورے کے دوران گفتگو کرتے ہوئے انہوں نے بتایا کہ ریاست کے تمام داخلی اور خارجی راستے اگلے دو دنوں میں ٹریفک اور عام آمدورفت کے لیے مکمل طور پر کھول دیے جائیں گے۔
وزیراعظم آزاد کشمیر کا کہنا تھا کہ خطے میں انٹرنیٹ کی فراہمی مرحلہ وار بنیادوں پر شروع کی جائے گی، جس کے ابتدائی مرحلے میں طالب علموں اور تعلیمی نظام کی ضرورت کو مدنظر رکھتے ہوئے تعلیمی اداروں کے لیے سروسز آئندہ دو روز میں بحال کردی جائیں گی۔
واضح رہے کہ مسلم لیگ (ن) کے بیرسٹر افتخار گیلانی دو روز قبل آزاد کشمیر قانون ساز اسمبلی کے ایوان سے 30 ووٹ حاصل کر کے ریاست کے 17ویں وزیراعظم کی حیثیت سے منتخب ہوئے تھے۔