ترکیہ، پاکستان اور سعودی عرب کے درمیان مکہ مشترکہ دفاعی معاہدے کے تحت قائم اسٹریٹجک سیاسی و دفاعی کمیٹی کا پہلا اجلاس شروع ہوگیا۔
اجلاس میں ترکیہ کے وزیر خارجہ حاقان فیدان، وزیر دفاع یاشار گیولر اور چیف آف جنرل اسٹاف جنرل سلچوق بائراکتار اولو شریک ہیں جبکہ پاکستان کی نمائندگی نائب وزیراعظم و وزیر خارجہ اسحاق ڈار، وزیر دفاع خواجہ آصف اور فیلڈ مارشل سید عاصم منیر کر رہے ہیں۔
سعودی وفد میں وزیر خارجہ فیصل بن فرحان، وزیر دفاع خالد بن سلمان اور چیف آف جنرل اسٹاف جنرل فیاض بن حامد الرویلی شامل ہیں۔
ذرائع کے مطابق اجلاس میں علاقائی و عالمی سیکیورٹی صورتحال، دفاعی تعاون، مشترکہ فوجی مشقوں، دفاعی صنعت، جدید ٹیکنالوجی اور دہشت گردی کے خلاف مشترکہ اقدامات پر غور کیا جائے گا۔
تینوں ممالک کے درمیان مشترکہ دفاعی پیداوار، تحقیق و ترقی اور مسلح افواج کے باہمی تعاون کو مزید وسعت دینے کے امکانات بھی زیر بحث آئیں گے جبکہ مستقبل کے مشترکہ منصوبوں کے لیے جامع روڈ میپ پر بھی غور متوقع ہے۔
واضح رہے کہ ترکیہ، پاکستان اور سعودی عرب نے 7 اگست کو مکہ مکرمہ میں مشترکہ دفاعی معاہدے پر دستخط کیے تھے جس کے تحت کسی ایک ملک پر حملے کو تمام فریقین پر حملہ تصور کیا جائے گا۔