ایران کے صدر مسعود پزشکیان نے کرغزستان روانگی سے قبل میڈیا سے گفتگو کرتے ہوئے کہا ہے کہ ایران جنگ کا خواہاں نہیں لیکن کسی بھی جارحیت کے سامنے خاموش نہیں رہے گا اور ہر جارح کو فیصلہ کن جواب دے گا۔
ان کا کہنا تھا کہ خطے میں عدم استحکام اور بے امنی کسی بھی ملک کے مفاد میں نہیں ہے اور اس سے تمام ممالک کے لیے مشکلات پیدا ہوں گی، اس لیے علاقائی سلامتی اور معاشی ترقی کے لیے مل کر کام کرنے کی ضرورت ہے۔
ایرانی صدر نے شنگھائی تعاون تنظیم (ایس سی او) اجلاس کی اہمیت کو اجاگر کرتے ہوئے کہا کہ بین الاقوامی بیانیہ مسلط کرنے کی کوششوں کے مقابلے میں یہ اجلاس انتہائی اہم ہے۔
انہوں نے امید ظاہر کی کہ اجلاس کی سائیڈ لائن ملاقاتیں علاقائی سلامتی، معاشی اور سیاسی امور کو آگے بڑھانے میں مددگار ثابت ہوں گی اور ان سے تمام ممالک کے لیے مثبت و سازگار نتائج سامنے آئیں گے۔