پی ٹی آئی کے صوبائی وزیر مینا خان آفریدی کے خلاف 9 مئی کے واقعات سے متعلق مقدمے میں عدالتی احکامات پر ان کا پاسپورٹ بلیک لسٹ اور ضبط کرنے کی کارروائی شروع کر دی گئی۔
ذرائع کے مطابق ایس ایس پی انویسٹی گیشن نے ڈائریکٹر جنرل امیگریشن اینڈ پاسپورٹس کو خط ارسال کر دیا ہے، جس میں مینا خان آفریدی کا پاسپورٹ بلاک اور ضبط کرنے سے متعلق عدالتی حکم پر عمل درآمد کی درخواست کی گئی ہے۔
مینا خان آفریدی اسلام آباد میں 9 مئی کے واقعات کے حوالے سے درج مقدمے میں مطلوب ہیں۔ انسداد دہشت گردی عدالت کے مطابق وہ ایف آئی آر نمبر 544/24 میں نامزد ملزم ہیں۔
عدالت نے اپنے حکم میں قرار دیا تھا کہ مینا خان آفریدی گرفتاری سے بچنے کے لیے جان بوجھ کر روپوش ہیں، جبکہ ان کے خلاف ناقابل ضمانت وارنٹ گرفتاری بھی جاری کیے جا چکے ہیں۔
عدالتی احکامات کی روشنی میں متعلقہ حکام نے اب ان کا پاسپورٹ بلیک لسٹ کرنے اور ضبط کرنے کے لیے قانونی کارروائی کا آغاز کردیا ہے۔