پاکستان کے نئے سیکریٹری خارجہ عاصم افتخار احمد نے نیویارک میں گفتگو کرتے ہوئے کہا ہے کہ پاکستان مشرق وسطیٰ میں جاری تنازعات کے پرامن اور بین الاقوامی قوانین کے مطابق حل کے لیے فعال کردار ادا کر رہا ہے اور مکہ معاہدے کے تحت اضافی ذمہ داریاں سنبھال رہا ہے۔
انہوں نے کہا کہ خطے کی بگڑتی صورتحال کا مکمل ادراک ہے اور پاکستان کی اولین ترجیح سیز فائر، کشیدگی میں کمی اور فریقین کو مذاکرات کی میز پر لانا ہے، کیونکہ اقوام متحدہ کے چارٹر کے مطابق تنازعات کا حل جنگ نہیں بلکہ سفارت کاری میں مضمر ہے۔
انہوں نے واضح کیا کہ پاکستان مکہ معاہدے میں شامل تینوں ممالک کے ساتھ مل کر خطے میں امن کے لیے اپنی ذمہ داری پوری کر رہا ہے جبکہ ایران و امریکہ کے درمیان کشیدگی میں کمی لانے والے ممالک میں بھی سرفہرست رہا ہے۔
سیکریٹری خارجہ نے مزید کہا کہ فلسطین اور کشمیر کے دیرینہ مسائل کا حل اقوام متحدہ کی سلامتی کونسل کی قراردادوں کے مطابق ہی ممکن ہے اور اس تاثر کو رد کیا کہ اقوام متحدہ عالمی امن کے لیے فعال نہیں ہے، جبکہ پاکستان پائیدار امن کے لیے عالمی برادری کے ساتھ کوششیں جاری رکھے گا۔