وفاقی وزیر داخلہ محسن نقوی کی ہدایت پر شہریوں کو ڈیجیٹل سہولیات کی فراہمی کے عمل میں مزید تیزی لائی گئی ہے، نادرا نے پنشنرز کے لیے پروف آف لائف سرٹیفکیٹ کے حصول کا طریقہ کار مزید آسان کردیا۔
نادرا کے مطابق گزشتہ ایک ماہ کے دوران 3 لاکھ 37 ہزار سے زائد پنشنرز نے پروف آف لائف سرٹیفکیٹ حاصل کیا، جن میں تقریباً 52 فیصد نے پاک آئی ڈی ایپ کے ذریعے گھر بیٹھے یہ سہولت حاصل کی۔
اعداد و شمار کے مطابق ایک لاکھ 74 ہزار 906 پنشنرز نے پاک آئی ڈی ایپ، ایک لاکھ 34 ہزار 521 نے نادرا رجسٹریشن سینٹرز، 24 ہزار 248 نے ای سہولت مراکز جبکہ 3 ہزار 585 پنشنرز نے موبائل رجسٹریشن وینز کے ذریعے پروف آف لائف سرٹیفکیٹ حاصل کیا۔
نادرا کے مطابق تقریباً 40 فیصد پنشنرز نے رجسٹریشن سینٹرز اور 7 فیصد نے ای سہولت مراکز سے یہ سہولت حاصل کی۔
نادرا نے کہا ہے کہ پنشنرز اب پاک آئی ڈی ایپ کے ذریعے گھر بیٹھے پروف آف لائف سرٹیفکیٹ حاصل کرسکتے ہیں، جس سے انہیں نادرا مراکز پر حاضری دینے کی ضرورت کم ہوجائے گی۔