وفاقی وزیر مملکت برائے داخلہ سینیٹر طلال چوہدری نے اسلام آباد کو سومنات بنانے کی دھمکی پر شدید ردعمل کا اظہار کرتے ہوئے کہا ہے کہ اگر کوئی پرامن شہری کے طور پر آئے تو اس کا استقبال ہے، لیکن اگر کوئی دہشت گرد بن کر آئے گا تو اسے واپس جانے نہیں دیا جائے گا اور کسی بھی قسم کا غیر قانونی اقدام برداشت نہیں کیا جائے گا۔
جیو نیوز سے گفتگو کرتے ہوئے سینیٹر طلال چوہدری نے واضح کیا کہ اسلام آباد ہائیکورٹ کے حکم پر مکمل طور پر عمل درآمد کیا جائے گا اور دارالحکومت میں شہریوں کی جان و مال کو خطرے میں ڈالنے یا کسی بھی غیر قانونی عمل کی اجازت نہیں دی جائے گی۔
سیاسی مخالفین کو تنقید کا نشانہ بناتے ہوئے انہوں نے کہا کہ خیبر پختونخوا میں ان سے دہشت گردی پر قابو نہیں پایا جا سکا، وہاں عوام کو صحت اور تعلیم جیسی بنیادی سہولیات میسر نہیں ہیں اور وہ اسلام آباد کو سومنات بنانے کی باتیں کر رہے ہیں، جبکہ حقیقت یہ ہے کہ انہوں نے خود کے پی کو سومنات بنا دیا ہے۔
طلال چوہدری کا مزید کہنا تھا کہ انہوں نے خود ہی اپنا اصل منصوبہ ظاہر کر دیا ہے، تاہم اس قسم کی سوچ کو کسی صورت آگے نہیں بڑھنے دیا جائے گا۔