امیر جماعت اسلامی پاکستان حافظ نعیم الرحمان نے حکومت سے مطالبہ کیا ہے کہ عوام کو مہنگائی سے ریلیف دینے کے لیے پیٹرولیم لیوی مکمل طور پر ختم کی جائے۔
سکھر میں پریس کانفرنس کرتے ہوئے حافظ نعیم الرحمان نے کہا کہ پیٹرولیم لیوی کے معاملے پر حکومت کے ساتھ مذاکرات کے پانچ دور ہوچکے ہیں۔ حکومت کا کہنا ہے کہ لیوی وصول نہیں کی جائے گی، اگر ایسا ہے تو بتایا جائے کہ اس کے متبادل مالی وسائل کہاں سے حاصل کیے جائیں گے۔
انہوں نے کہا کہ پیٹرولیم لیوی ٹیکس کی مد میں عوام پر 135 ارب روپے کا بوجھ ڈالا گیا ہے، جبکہ بڑھتی ہوئی مہنگائی نے عام شہری کے لیے زندگی مشکل بنا دی ہے۔ عوام کو مہنگائی کے طوفان سے نکالنے کے لیے فوری اقدامات کی ضرورت ہے۔
امیر جماعت اسلامی نے کہا کہ جماعت اسلامی کا مارچ اور تحریک ملک بھر کے عوام کے لیے ہے، احتجاجی مارچ کا پہلا مرحلہ کامیابی سے مکمل کرلیا گیا ہے۔
حافظ نعیم الرحمان کا کہنا تھا کہ جماعت اسلامی کا مقصد جلاؤ گھیراؤ یا تشدد ہرگز نہیں، پُرامن احتجاج کے ذریعے عوام کے مسائل اجاگر کیے جارہے ہیں۔ انہوں نے مزید کہا کہ پالیسی ریٹ میں کمی سے ملکی معیشت کو فائدہ پہنچ سکتا ہے۔