لانگ مارچ کے سلسلے میں پولیس کی بیشتر نفری اسلام آباد روانہ ہونے کے بعد تھانوں میں لیڈی پولیس اہلکاروں سے فیلڈ ڈیوٹی لینے کا فیصلہ کیا گیا ہے۔
ذرائع کے مطابق لانگ مارچ ڈیوٹی کے لیے پولیس نفری اسلام آباد روانہ ہونے کے باعث تھانوں میں دستیاب لیڈی پولیس اہلکاروں کو مختلف فیلڈ ذمہ داریاں سونپی جائیں گی۔
ذرائع کا کہنا ہے کہ لیڈی پولیس اہلکار 15 ایمرجنسی کالز پر رسپانس دیں گی جبکہ تھانوں میں سنتری ڈیوٹی بھی لیڈی پولیس اہلکار انجام دیں گی۔
ڈے گشت کے دوران لیڈی پولیس اہلکار پولیس گاڑی میں 15 کالز پر رسپانس دیں گی۔ ضرورت پڑنے پر دو، دو لیڈی پولیس اہلکاروں کو نائٹ گشت پر بھی تعینات کیا جائے گا۔
پولیس حکام کے مطابق دستیاب نفری کو موجودہ سیکیورٹی صورتحال اور عوامی شکایات پر فوری رسپانس یقینی بنانے کے لیے مختلف ذمہ داریاں تفویض کی جا رہی ہیں۔