ایران کے صدر مسعود پزشکیان نے کہا ہے کہ سپریم لیڈر مجتبیٰ خامنہ ای طبی طور پر مکمل صحت مند ہیں اور ان کے چہرے اور ٹانگوں پر آنے والے زخم بھی ٹھیک ہو چکے ہیں۔
امریکی نشریاتی ادارے کو انٹرویو میں مسعود پزشکیان نے بتایا کہ ان کی مجتبیٰ خامنہ ای سے دو مرتبہ ملاقات ہوئی، جن میں سے ایک ملاقات 7 گھنٹے سے زائد جاری رہی۔
آبنائے ہرمز سے متعلق ایرانی صدر نے کہا کہ ایران کی پیشکش قبول ہونے کی صورت میں آبنائے ہرمز کھولنے اور مذاکرات بحال کرنے کے وعدوں پر عمل کیا جائے گا۔ ان کے مطابق امریکا نے پیشکش قبول کی تو اسی روز مذاکرات شروع ہوسکتے ہیں۔
مسعود پزشکیان نے امریکا سے بداعتمادی کا اظہار کرتے ہوئے کہا کہ واشنگٹن ماضی میں کیے گئے تحریری وعدوں کی پاسداری نہیں کر سکا۔ انہوں نے کہا کہ ایران اقوام متحدہ کے جوہری معائنہ کاروں کو ملک میں داخلے کی اجازت دینے کے لیے بھی تیار ہے۔