وفاقی دارالحکومت کے سیکٹر آئی 12 میں بی ایچ ایف ہیڈ کے پیچھے واقع تالاب میں 13 سالہ محسن نامی بچہ نہاتے ہوئے گہرے پانی میں ڈوب گیا۔
واقعے کی اطلاع ملنے پر گروپ کمانڈر ظہیر کی قیادت میں ریسکیو ٹیم فوری طور پر موقع پر پہنچی اور امدادی کارروائیاں شروع کر دیں۔
ریسکیو اہلکاروں نے تقریباً ڈیڑھ گھنٹے کی مسلسل جدوجہد کے بعد بچے کو تالاب سے باہر نکالا اور فوری طور پر اسپتال منتقل کیا، تاہم وہ جانبر نہ ہو سکا اور دم توڑ گیا۔
کم عمر بچے کے اس المناک انتقال پر علاقے میں شدید غم کی لہر دوڑ گئی ہے۔ واقعے کے بعد شہریوں سے اپیل کی گئی ہے کہ وہ اپنے بچوں کو تالابوں، جوہڑوں اور ایسے دیگر خطرناک اور گہرے پانی والے مقامات پر اکیلے جانے یا نہانے سے سختی سے منع کریں تاکہ اس طرح کے دلخراش حادثات سے بچا جا سکے۔