کراچی کی ماڈل کرمنل کورٹ ایسٹ نے گلستان جوہر میں جعلی پولیس مقابلے میں نوجوان کی ہلاکت کے مقدمے کا فیصلہ سناتے ہوئے جرم ثابت ہونے پر شاہین فورس کے پولیس اہلکار شہریار کو سزائے موت کی سزا سنا دی ہے۔
عدالت نے کیس میں نامزد دیگر شریک ملزمان اہلکار ناصر اور فیصل کو عمر قید کی سزا سنائی، جبکہ تینوں ملزمان کو مقتول کے ورثا کو پانچ، پانچ لاکھ روپے بطور معاوضہ ادا کرنے کا بھی حکم دیا۔
پراسیکیوشن کے مطابق شاہین فورس کے اہلکاروں نے گلشن اقبال میں عامر نامی نوجوان کو رکنے کا اشارہ کیا تھا، اور نہ رکنے پر تعاقب کرتے ہوئے ایک رہائشی فلیٹ میں داخل ہو کر اس پر فائرنگ کردی تھی۔
اہلکاروں نے ابتدائی طور پر واقعے کو پولیس مقابلہ قرار دیا تھا، تاہم حقائق سامنے آنے پر ملزمان کے خلاف سن 2022 میں تھانہ شاہراہ فیصل میں مقدمہ درج کیا گیا تھا۔