پشاور کے علاقے دیر کالونی میں نجی اسکول کی چھت گرنے سے 28 بچے اور ایک خاتون ٹیچر جاں بحق جبکہ 40 سے زائد طلبہ اور اساتذہ زخمی ہوگئے۔ حادثے کے بعد علاقے میں امدادی کارروائیاں جاری ہیں۔
ریسکیو 1122 کے مطابق اسکول کی چھت گرنے سے متعدد بچے اور عملہ ملبے تلے دب گئے۔ ریسکیو ٹیموں نے زخمیوں کو نکال کر لیڈی ریڈنگ اسپتال منتقل کیا، جہاں ایمرجنسی نافذ کردی گئی ہے۔ اسپتال انتظامیہ کے مطابق بعض زخمیوں کی حالت تشویش ناک ہے، جبکہ جاں بحق ہونے والے بچوں کی عمریں 13 سال تک ہیں۔
واقعے کے بعد پاک فوج اور دیگر امدادی ادارے بھی ریسکیو آپریشن میں حصہ لے رہے ہیں اور ملبے تلے دبے افراد کو نکالنے کی کوششیں جاری ہیں۔ مزید اموات کا خدشہ بھی ظاہر کیا جارہا ہے۔
وزیراعظم شہباز شریف نے قیمتی جانوں کے ضیاع پر گہرے دکھ اور افسوس کا اظہار کرتے ہوئے زخمیوں کو بہترین طبی سہولیات فراہم کرنے کی ہدایت کی ہے۔ گورنر خیبرپختونخوا فیصل کریم کنڈی نے بھی واقعے پر افسوس کا اظہار کرتے ہوئے متعلقہ حکام سے تفصیلی رپورٹ طلب کرلی ہے۔