فیلڈ مارشل سید عاصم منیر نے واضح کیا ہے کہ دہشت گرد جہاں بھی ہوں گے انہیں بھرپور ضرب لگائی جائے گی اور دہشت گرد تنظیموں کے خلاف کارروائیاں پوری شدت سے جاری رہیں گی۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے کور ہیڈکوارٹرز پشاور کا دورہ کیا، جہاں انہیں خیبرپختونخوا کی سیکیورٹی صورت حال، انسداد دہشت گردی کی کارروائیوں، سرحدی انتظامات اور فوجی دستوں کی آپریشنل تیاریوں پر بریفنگ دی گئی۔
اس موقع پر انہوں نے افسران اور جوانوں کے بلند حوصلے اور پیشہ ورانہ مہارت کو سراہتے ہوئے دہشت گردی کے خطرات سے نمٹنے کے لیے اعلیٰ سطح کی تیاری اور مسلسل چوکس رہنے کی ہدایت کی۔
آئی ایس پی آر کے مطابق فیلڈ مارشل نے بھارتی سرپرستی میں سرگرم دہشت گرد تنظیموں کے خلاف کارروائیاں جاری رکھنے کے عزم کا اظہار کیا اور کہا کہ عوام کی حمایت سے پاکستان دہشت گردوں اور ان کے گمراہ کن نظریے کو مکمل شکست دے گا۔ انہوں نے شہداء اور سیکیورٹی فورسز کے غازیوں کو بھی خراج تحسین پیش کیا۔