سعودی عرب کے گورنریٹ ینبع میں تمام تعلیمی اداروں کی بندش اور آن لائن تدریس کا سلسلہ 12 نومبر تک جاری رکھنے کا فیصلہ کیا گیا ہے۔
امارتِ مدینہ منورہ کی جانب سے جاری اعلامیے کے مطابق ینبع گورنریٹ کے تمام طلبہ و طالبات کو گھروں سے تعلیم حاصل کرنے کی ہدایت کی گئی ہے، جبکہ تدریسی سرگرمیاں آن لائن جاری رہیں گی۔
اعلامیے کے مطابق فیصلے کا اطلاق صرف طلبہ و طالبات تک محدود نہیں ہوگا بلکہ اسکولوں کے تدریسی اور انتظامی عملے کو بھی اس فیصلے کے دائرہ کار میں شامل کیا گیا ہے۔
سعودی وزارتِ تعلیم کے منظور شدہ ڈیجیٹل تعلیمی نظام کے تحت طلبہ و طالبات اپنی کلاسز، اسباق اور دیگر تعلیمی سرگرمیاں آن لائن جاری رکھیں گے۔ اس مقصد کے لیے مدرستی پلیٹ فارم سمیت دیگر منظور شدہ ڈیجیٹل تعلیمی پلیٹ فارمز استعمال کیے جائیں گے۔
متعلقہ حکام کے مطابق مدرستی پلیٹ فارم کے ذریعے اساتذہ طلبہ کو تعلیمی مواد فراہم کرنے، آن لائن تدریس اور تعلیمی سرگرمیوں کے تسلسل کو یقینی بنانے کے لیے ضروری سہولیات فراہم کریں گے۔