صدر مملکت آصف علی زرداری اور وفاقی وزیر داخلہ محسن نقوی کے درمیان اہم ملاقات ہوئی، جس میں ملک کی سیاسی صورتحال، سیکیورٹی امور اور نئے صوبوں کے قیام سمیت مختلف معاملات پر تبادلہ خیال کیا گیا۔
ذرائع کے مطابق نواب شاہ میں ہونے والی ملاقات تقریباً ایک گھنٹے تک جاری رہی۔ ملاقات میں ملک کو درپیش سیکیورٹی صورتحال اور سیاسی معاملات کے علاوہ نئے صوبوں کے قیام سے متعلق امور بھی زیر بحث آئے۔
واضح رہے کہ وفاقی وزیر داخلہ محسن نقوی نے گزشتہ روز میڈیا سے گفتگو کرتے ہوئے کہا تھا کہ نئے صوبوں کے معاملے پر عوام کی رائے کو اہمیت دی جانی چاہیے، اگر ریفرنڈم کے ذریعے عوام صوبوں کے قیام کے حق میں فیصلہ دیں تو نئے صوبے بنائے جاسکتے ہیں۔
محسن نقوی کا کہنا تھا کہ ملک میں ری سیٹ کے معاملے پر وہ اور چیئرمین پاکستان پیپلز پارٹی بلاول بھٹو زرداری ایک پیج پر ہیں، تمام سیاسی جماعتیں اہم ہیں اور کوئی بھی فیصلہ باہمی اختلافات کی بنیاد پر نہیں کیا جائے گا۔