18 سالہ حکومت میں سندھ جنت بن گیا، کراچی پر دنیا رشک کرتی ہے، خواجہ آصف کا طنز

image

وزیر دفاع خواجہ آصف نے چیئرمین پاکستان پیپلز پارٹی بلاول بھٹو زرداری کی تقریر پر سخت ردعمل ظاہر کرتے ہوئے سوال اٹھایا ہے کہ کیا ان کے اپنے ہاتھ صاف ہیں اور کیا وہ لیکچر یا دھمکی دینے کا حق رکھتے ہیں؟

سماجی رابطے کی ویب سائٹ ایکس پر اپنے بیان میں خواجہ آصف نے بلاول بھٹو کو مخاطب کرتے ہوئے کہا کہ سسٹم کو ری سیٹ کرنے کی بات کی جا رہی ہے، لیکن کوئی بھی نظام عوامی تائید کے بغیر ری سیٹ نہیں ہوسکتا۔ ان کے مطابق اگر نظام کی ناکامی کی بات ہو رہی ہے تو اس سے منسلک ہونے کے ناطے ہم سب کو اپنی ذمہ داریوں کا بھی جائزہ لینا ہوگا، کیونکہ ملک میں سیاستدانوں کا احتساب کوئی نئی بات نہیں اور نہ ہی کوئی اس سے مبرا ہے۔

وزیر دفاع نے بلاول بھٹو کی پریس کانفرنس کو حکومت اور نظام پر تنقید قرار دیتے ہوئے کہا کہ سیاستدانوں کو عوام سے رجوع کرنے کے طریقہ کار کو "چور دروازہ" نہیں کہنا چاہیے۔ ان کا کہنا تھا کہ عوامی استصوابِ رائے کے ساتھ پارلیمان کے اندر بحث مباحثے پر کوئی پابندی نہیں ہے اور سسٹم ری سیٹ کے معاملے پر پارلیمان میں ضرور بات ہوگی، تاہم عوام کو ان کے بنیادی حق سے محروم نہیں کیا جاسکتا اور پارلیمان کے ساتھ عوامی رائے جاننا ہی اصل آئینی جواز کی معراج ہے۔

خواجہ آصف نے گزشتہ 18 برس سے سندھ میں پیپلز پارٹی کی حکومت پر طنز کرتے ہوئے کہا کہ سندھ جنت بن گیا ہے اور کراچی شہر کی حالت پر دنیا رشک کرتی ہے۔ انہوں نے مزید کہا کہ پیپلز پارٹی 2022 سے مسلم لیگ (ن) کے ساتھ کاروبارِ حکومت میں شریک ہے، تو کیا سارا نفع ان کا اور نقصان مسلم لیگ (ن) یا پاکستان کا ہے؟

اپنے بیان کے اختتام پر وزیر دفاع نے زور دیا کہ حکمرانی میں عوام کی شراکت کو حقیقت بنایا جائے کیونکہ حکمرانوں کی طاقت عوام کی امانت ہے، کسی کی میراث یا اجارہ داری نہیں، اور عوام کے حقوق کو صرف آئین کی کتاب تک محدود نہ رکھا جائے۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US