سندھ حکومت نے صوبے کے نوجوانوں کو عالمی فری لانسنگ مارکیٹ سے منسلک کرنے اور گھر بیٹھے بین الاقوامی آمدنی کے مواقع فراہم کرنے کا فیصلہ کرلیا۔
سینئر صوبائی وزیر شرجیل انعام میمن کے مطابق آئی ورک فار سندھ کے تحت عالمی فری لانسنگ منصوبوں اور انٹرنیشنل بِڈنگ کا خصوصی نظام جلد متعارف کرایا جائے گا۔
اس نظام کے تحت بین الاقوامی منصوبوں کی تفصیلات روزانہ پلیٹ فارم پر دستیاب ہوں گی، جبکہ ایک خصوصی ٹیم ان منصوبوں کے حصول کے لیے بولیاں جمع کرائے گی۔ حاصل ہونے والے پروجیکٹس سندھ کے ہنرمند فری لانسرز، پروفیشنلز اور کاروباری اداروں کو فراہم کیے جائیں گے۔
شرجیل میمن کا کہنا ہے کہ فری لانسنگ میں خواتین کی شمولیت بڑھانے کے لیے گھر بیٹھے کام کرنے کا خصوصی فیچر بھی متعارف کرایا جا رہا ہے۔ اس اقدام سے نوجوانوں کے لیے روزگار کے نئے مواقع پیدا ہونے اور صوبے کی ڈیجیٹل معیشت کے فروغ میں مدد ملے گی۔