پاکستان شوبز انڈسٹری سے وابستہ معروف اور سینئر اداکارہ سنگیتا نے اپنے انٹرویو میں پاکستانی اداکارؤں کے لباس پر اعتراض کرتے ہوئے کہا کہ ہماری اداکارائیں اپنی ثقافت چھوڑ کر ہالی ووڈ کی ثقافت اپنا رہی ہیں۔
دورانِ انٹرویو سنگیتا سے سوال کیا گیا کہ کیا ایک اچھی اداکارہ بننے کے لیے نامناسب لباس پہننا ضروری ہے؟
اِس سوال کا جواب دیتے ہوئے سنگیتا نے کہا کہ نہیں ایک اچھی اداکارہ بننے کے لیے سب سے اہم آپ کی اداکاری ہے، آپ کو صرف اپنی اداکاری پر توجہ مرکوز کرنی چاہئے۔
سینئر اداکارہ نے کہا میں جب کسی ایوارڈ شو میں نوجوان اداکاراؤں کو دیکھتی ہوں تو مجھے بہت عجیب محسوس ہوتا ہے۔
اُنہوں نے کہا کہ آج کی اداکاراؤں کو دیکھ کر میں یہ سوچتی ہوں کہ آپ پاکستانی کلچر کو چھوڑ کر ہالی ووڈ کو کیوں کاپی کر رہی ہیں، آپ اپنا کلچر، پاکستانی طرزِ لباس اپنائیں۔
سنگیتا نے پاکستانی اداکارؤں کو تجویز دیتے ہوئے کہا کہ اگر آپ شلوار قمیض، چوڑی دار پاجامہ، لمبی فراک اور بڑے دوپٹے پہنیں تو دیکھیں آپ ان لباس میں کتنی خوبصورت لگیں گی۔
اُنہوں نے اداکارؤں کو مخاطب کرتے ہوئے کہا کہ آپ پاکستانی طرز کے لباس پہننے کے بجائے چھوٹی چھوٹی اور نامناسب میکسیاں پہن کر آتی ہیں جو مجھے بلکل اچھا نہیں لگتا ۔