حال ہی میں پاکستانی شوبز انڈسٹری کی لیجنڈری اداکارہ روبینہ اشرف نے اپنے مداحوں کے سامنے اس بات کا انکشاف کیا ہے کہ ان کا پسندیدہ ڈرامہ کون سا ہے اور اس کی وجہ کیا ہے؟
اداکارہ کے مطابق 'مجھے اپنے سب سے زیادہ پسندیدہ ڈراموں میں سے پسِ آئینہ صرف اس لئے پسند ہے کہ اس میں پہلی مرتبہ کِسی خاتون کو سرکاری عہدے پر مکمل انداز میں اجاگر کیا گیا'۔
ان کا کہنا تھا کہ 'ڈرامہ سیریل پسِ آئینہ میں، میں نے پولیس انسپکٹر کا کردار ادا کیا اور یہ پی ٹی وی کی تاریخ کا پہلا موقع تھا کہ جب کسی خاتون کو اس طرح کا کردار دیا گیا ہو۔ اس ڈرامہ میں جرم اور سزا کو موضوع بنایا گیا اور میں نے پولیس کی وردی پہن کر اس وردی کی عزت رکھی'۔
اداکارہ نے مزید کہا کہ 'میں نے پی ٹی وی سے متعدد ڈرامے کئے لیکن پِھر کراچی شفٹ ہوگئی اور وہاں پر ڈرامہ سیریلز کی ایک لمبی لائن میر ے حصے میں آگئی اور یہیں کی ہوکر رہ گئی۔ میں جب بھی لاہور آتی ہوں تو اپنے پرانے دوستوں سے ضرور ملاقات کرتی ہوں'۔