بالی ووڈ کے سپر اسٹار ہریتھک روشن نے ہکلاہٹ کے شکار پاکستانی طالب علم کی حوصلہ افزائی کرتے ہوئے انہیں اپنے مقصد سے پیچھے نہ ہٹنے کی تلقین کی ہے۔
تفصیلات کے مطابق سماجی رابطے کی ویب سائٹ ٹوئٹر پر ہریتھک روشن نے ایک پاکستانی لڑکی کی ٹوئٹ کا جواب دِیا۔
لڑکی نے لکھا کہ ان کے کزن اٹک اٹک کر بولتے ہیں اور یونیورسٹی میں ایک پریزینٹیشن کے دوران لیکچرار نے کہا کہ اگر تم ٹھیک سے نہیں بول سکتے تو پڑھائی چھوڑ دینی چاہیے۔ لڑکی نے مزید لکھا کہ لیکچرار کے اس رویہ کے بعد سے ان کا کزن ڈپریشن میں مبتلا ہے اور اپنے آپ کو کمرے میں بند کیا ہوا ہے۔
بھارتی اداکار ہریتھک روشن نے جواب میں لکھا کہ 'اپنے کزن سے کہو کہ لیکچرار اور ان کے مشورے کا کزن کی ہکلاہٹ سے کوئی تعلق نہیں، اٹک اٹک کر بولنا کچھ بڑا کرنے سے آپ کے کزن کو نہیں روک سکتا'۔
پاکستانی لڑکی کو مخاطب کرتے ہوئے ان کا مزید کہنا تھا کہ 'وہ اپنے کزن کو بتائیں کہ اس میں ان کا کوئی قصور نہیں اور نہ ہی ان کو اس میں شرم محسوس کرنی چاییے، تاہم جو لوگ انہیں شرم دلاتے ہیں وہ خود دماغ سے خالی ہیں'۔