سوشل میڈیا پر اپنی چٹ پٹی باتوں سے مشہور ہونے والی نمرہ علی کو یقینا آپ جانتے ہی ہوں گے، آج ہم آپ کو ان کے بارے میں چند دلچسپ باتیں بتانے والے ہیں۔
ٹوئٹر پر ٹاپ ٹرینڈ کرنے والی نمرہ جب بولنا شروع کرتی ہیں تو انہیں خاموش کروانا خاصا مشکل ہو جاتا ہے، تاہم انہوں نے حال ہی میں میٹرک کیا ہے، جبکہ کچھ دن قبل ان کا رزلٹ بھی آچکا ہے۔ نجی ٹی وی چینل کے ایک پروگرام میں گفتگو کرتے ہوئے نمرہ نے بتایا کہ ان کے میٹرک کے امتحان میں 700 نمبرز آئے ہیں۔
ان کا کہنا تھا کہ 'جب میں اسکول میں اپنا رزلٹ کارڈ لینے گئیں تو سب لوگ انہیں دیکھ کر بہت خوش ہوئے اور کہنے لگے کہ نمرہ تم تو مشہور ہوگئیں، اب ہمیں ٹریٹ دو'۔
نمرہ نے یہ بھی بتایا کہ 'سب میرے ساتھ آکر تصویریں بھی لے رہے تھے'۔
نان اسٹاپ بولنے والی اور کیمرے کے سامنے آنے کی شوقین نمرہ کے کئی چینلز نے انٹرویوز کیے جس سے انہیں بے حد پذیرائی ملی۔
ان کے حوالے سے آپ کو ایک اور دلچسپ بات بتاتے چلیں کہ جب نمرہ علی کا پہلا کلپ وائرل ہوا تھا تو پاکستانی ڈرامہ انڈسٹری کی صفِ اول کی اداکارہ یمنیٰ زیدی نے انہیں ڈرامہ سیریل پیار کے صدقے میں اپنے کردار ماہ جبیں سے تشبیہہ دی تھی۔
ماہ جبین کا کردار نمرہ جیسی چلبلی لڑکی کے بارے میں تھا۔