موٹروے کیس میں پولیس کو بڑی کامیابی حاصل ہوئی ہے۔
اس کیس میں اہم پیش رفت یہ ہوئی ہے کہ پولیس کی جانب سے متاثر ہ خاتون کو بیان دینے پر رضامند کر لیا گیا ہے۔ کیس کا مرکزی ملزم عابد ملہی تاحال فرار ہے جبکہ اس کا ساتھی شفقت پولیس کی تحویل میں ہے۔
تفصیلات کے مطابق خاتون ٹیلیفون کے ذریعے اپنا ابتدائی بیان ریکارڈ کروائیں گی۔ پولیس ذرائع کا کہنا ہے کہ اعلیٰ حکام نے فیصلہ کیا ہے کہ عدالت سے ان کے کیمرہ ٹرائل کی درخواست کی جائے گی، جبکہ دوران ٹرائل خاتون کے اصلی نام کی بجائے فرضی نام کا استعمال کیا جائے گا۔
خیال رہے پولیس کی جانب سے عابد ملہی کو گرفتار کرنے کے لیے سینٹرل اور ساؤتھ پنجاب میں چھاپے مارے جارہے ہیں، کیونکہ پولیس نے یہ خدشہ ظاہر کیا ہے کہ عابد ملہی مذکورہ علاقوں میں مزدور یا بھکاری کے بھیس میں موجود ہے۔