سعودی عرب نے بیرون ملک سے آنے والے عمرہ زائرین کی آمد پر پابندی کو ختم کرنے کا فیصلہ کیا ہے جس کے بعد بیرون ملک سے آنے والے زائرین بھی عمرے کی سعادت حاصل کرسکیں گے۔
عرب نیوز کے مطابق کورونا وبا کی وجہ سے عمرے پر پابندی کو مرحلہ وار بحال کیا جا رہا ہے جس کے تیسرے مرحلے میں 1 نومبر سے بیرون ملک سے عمرے کے خواہشمند افراد کو بھی مقدس سرزمین میں داخلے اور عمرے کی سعادت حاصل کرنے کی اجازت ہوگی۔
ملک کی وزارت برائے حج و عمرہ کی جانب سے یہ اعلان کیا گیا ہے کہ 'کورونا وائرس کے نئے کیسز میں کمی ہونے کی وجہ سے سعودی حکومت نے بیرون ملک سے عمرے کے لیے آنے والے زائرین کو اجازت دینے کا فیصلہ کرلیا ہے۔ ہر ہفتے 10 ہزار خوش نصیبوں کو منتخب کیا جائے گا، بعدازاں انہیں 50 افراد کے الگ الگ گروپس میں تقسیم کیا جائے گا'۔
زائرین کو سعودی عرب پہنچ کر تین دن تک ہوٹل میں قرنطینہ کیا جائے گا اور عمرہ ادائیگی سے پہلے عمرہ کی سعادت حاصل کرنے والوں کے کورونا ٹیسٹ کیے جائیں گے۔
تاہم پاکستان میں کورونا کے کیسز میں کمی کے باعث پاکستانی عمرہ زائرین بھی سعادت حاصل کرسکیں گے۔