کورونا وائرس کی تیسری لہر کے خطرات کے پیشِ نظر وزیر مذہبی امور نور الحق قادری نے اعلان کیا ہے کہ اس سال ممکنہ طور پر سعودی عرب 50 ہزار پاکستانیوں کو حج ادا کرنے کی اجازت دے گا۔
2021 میں حج خصوصی حالات اور قوانین کے تحت ادا کیا جائے گا جس میں عمر سمیت دیگر پابندیوں کا بھی خیال رکھا جائے گا۔
حج کے دوران عازمین کو ایس او پیز پر سختی سے عملدرآمد کرنا ہو گا، اس سال صرف ان لوگوں کو حج کی ادائیگی کی اجازت دی جائے گی جو کورونا ویکسین لگوا چکے ہوں گے ، وزارت مذہبی امور سعودی حکام کی جانب سے عائد کی جانے والی شرائط پر مکمل عمل درآمد کروائے گی۔
مذہبی امور وزیر کے مطابق اس سال وبائی مرض کے باعث بیس سال سے کم اور پچاس سال سے زائد عمر والے افراد حج کیلئے نہیں جا سکیں گے ، سعودی حکام کی جانب سے صرف ان افراد کو حج کی اجازت دی جائے گی جنہیں کوئی صحت کے مسائل درکار نہ ہوں۔
یاد رہے اس سے قبل سعودی حکام نے کورونا ویکسین لگوانے والے اور صحت مند شہریوں کو ہی عمرہ کرنے اور خانہ کعبہ میں نماز کی ادائیگی کی اجازت دی تھی ۔