آپ نے پاکستانی اور بھارتی عوام کے درمیان دوستی اور محبت پر بنی فلمیں تو بہت دیکھی ہوں گی۔ لیکن حال ہی میں ایسا واقعہ پیش آیا ہے جس میں ایک پاکستانی نوجوان نے حقیقتاً انسان دوستی کی اعلیٰ مثال قائم کی اور پاکستان کا نام روشن کردیا۔
ہوا کچھ یوں کے غازی تیمور نامی پاکستانی جو لندن میں رہتے ہیں، انھیں وہاں کی شورڈیچ ہائی اسٹریٹ پر ایک پرس گرا ہوا ملا جسے کھولنے پر پتہ چلا کہ پرس پیسوں اور بینک کارڈز سے بھرا ہوا ہے۔ غازی نے کارڈز پر "راہول" کا نام پڑھتے ہی یہ طے کرلیا تھا کہ وہ انھیں ڈھونڈ کر پرس انھیں واپس کرکے ہی رہیں گے۔
بس پھر کیا تھا غازی تیمور نے سوشل میڈیا کا سہارا لیتے ہوئے ٹوئٹر پر پرس اور راہول کو ڈھونڈنے کے لئے کئی ٹوئٹس کرڈالے اور پھر انھیں ڈھونڈ ہی نکالا۔ پرس لوٹا دینے کے بعد غازی نے راہول کی خوشی کے آنسو لیے ایک تصویر بھی شئر کی جس پر انھوں نے لکھا کہ "ہم نے تمھیں ڈھونڈ لیا راہول"
غازی تیمور کی اس کوشش نے جہاں پاکستان کا نام روشن کیا ہے وہیں ٹوئٹر پر بھی دنیا بھر کے صارفین انھیں سراہ رہے ہیں۔