ٹوکیو میں ہونے والے کھیلوں کے میگا ایونٹ اولمپکس2020 میں جیولین تھرو کے ماہر کھلاڑی ارشد ندیم پاکستان کے لیے گولڈ میڈل جیتنے میں کامیاب نہ ہوسکے۔
باصلاحیت ایتھلیٹ ارشد ندیم اولمپکس 2020 میں پاکستان کی نماٸندگی کرنے والے آخری کھلاڑی رہ گٸے تھے جن پر پاکستان کی عوام کی نظریں جمی ہوٸی تھیں۔ انہوں نے میگا ایونٹ میں شاندار کارکردگی کا مظاہرہ کر کے دکھایا۔
ٹوکیو اولمپکس کے جیولین تھرو کے فائنل مقابلے میں 12 ایتھلیٹ پہلے راؤنڈ میں شامل تھے جن میں سے ٹاپ 8 نے اگلے راؤنڈ میں اپنی جگہ قاٸم کی۔ ان میں پاکستان کے ارشد ندیم 84.62 کے اسکور کے ساتھ چوتھے نمبر پر موجود رہے۔
میڈل راؤنڈ میں ٹاپ تین کھلاڑیوں کو گولڈ، سلور اور برانز میڈل کا حقدار ٹھہرنا تھا تاہم اس راؤنڈ میں ارشد ندیم بہترین پرفارمنس نہ دکھا سکے اور میڈل کی دوڑ سے باہر ہوگئے۔
دوسرے راؤنڈ میں پاکستان کے ارشد ندیم پانچویں نمبر پر رہے۔ بھارت کے نیرج چوپڑا نے اس مقابلے میں گولڈ، جمہوریہ چیک کے جیکب واڈلیچ نے سلور اور جمہوریہ چیک ہی کے ویتے سلاف ویسلے نے برانز میڈل اپنے نام کیا۔
سوشل میڈیا صارفین ارشد ندیم کو بھرپور سراہ رہے ہیں اور ان مستقبل کے لیے نیک خواہشات کا اظہار کر رہے ہیں۔