گزشتہ روز ایٹم بم بنانے کے خالق ڈاکٹر عبدالقدیر خان کے انتقال کی جھوٹی خبریں سوشل میڈیا پر اچانک پوسٹ ہونے لگیں جس کے بعد اب خود ڈاکٹر قدیر کا ردعمل سامنے آگیا ہے۔
ایٹمی سائنسدان ڈاکٹر عبدالقدیر خان کا کہنا ہےکہ کچھ احسان فراموش لوگ ان کے بارے میں منفی اور بے بنیاد خبریں چلا رہے ہیں۔
نجی ٹی وی چینل سے گفتگو کرتے ہوئے ڈاکٹر عبدالقدیر خان کا کہنا تھا کہ آپ سب میرے متعلق قیاس آرائیاں سن کر کافی پریشان ہوں گے، مجھے صبح بہت سے لوگوں کی فون کالز موصول ہو رہی تھیں، کچھ احسان فراموش لوگ میرےبارے میں جھوٹی خبریں لگا رہے ہیں۔
انہوں نے کہا کہ لوگ میری بیماری اور میری وفات سے متعلق بھی خبریں لگا رہے ہیں، اللہ کا شکر ہے میں بالکل ٹھیک ہوں، کئی سال ابھی اللہ مجھے ضرور زندہ رکھے گا تاکہ میں لوگوں کےدل جلاسکوں۔
ایٹمی سائنسدان کا کہنا تھا کہ میں بالکل ٹھیک ہوں، اگر ایسی کوئی بات ہوئی تو اہلخانہ کی طرف آپ سب کو معلوم ہو جاتا۔
واضح رہےکہ گزشتہ روز سوشل میڈیا پر ایٹمی سائنسدان ڈاکٹر عبدالقدیر خان کے انتقال کی خبریں گردش کررہی تھیں۔