انٹرنیٹ کے بغیر اب کسی بھی چیز کا تصور نہیں کیا جا سکتا کیونکہ یہ آج کے انسانوں کے لیے اہم ترین ضرورت اور لوگوں سے روابط قائم کرنے کا اہم ترین ذریعہ ہے۔
تھوڑی دیر کے لیے انٹرنیٹ کی رفتار کم ہوجائے تو صارفین کو پریشانی کا سامنا کرنا پڑتا ہے۔ جیسا کہ آج بھی انٹرنیٹ کی رفتار زیرسمندر میں فالٹ آنےسے کم ہوگئی ہے۔
ذرائع کے مطابق بحریہ ہند میں زیرِ سمندر انٹرنیشنل انٹرنیٹ کیبل میں فالٹ آنے کے باعث پاکستان میں بھی انٹرنیٹ سست روی کا شکار ہے۔
رپورٹ کے مطابق پی ٹی اے کی جانب سے کہا گیا ہے کہ پی ٹی سی ایل کی ایک بین الاقوامی سب میرین کیبل ایس ایم ڈبلیو 4 میں بحر ہند کے ایک مقام پر خرابی پیدا ہونے سے بعض انٹرنیٹ صارفین کو زیادہ کام کے اوقات کے دوران انٹرنیٹ کی اسپیڈ میں کمی کا سامنا کرنا پڑ سکتا ہے۔
تاہم صارفین کو بلاتعطل انٹرنیٹ کی فراہمی کی ضروریات کو پورا کرنے کے لیے انٹرنیٹ کے نظام میں اضافی ایڈ ہاک بینڈ وتھ شامل کرنے سمیت دیگر اقدامات کر لئے گئے ہیں۔
انٹرنیٹ کی مکمل بحالی کے لیے اس وقت تیزی کے ساتھ کام جاری ہے جس حوالے سے آگاہ کر دیا جائے گا۔