انسانی معاشرے میں وفاداری کیلئے اکثر جانوروں کی مثال دی جاتی ہے جبکہ حال ہی میں سوشل میڈیا کی زینت بننے والی ایک ویڈیو میں دو طوطوں کی ایک دوسرے کی مدد کی ویڈیو نے صارفین کے دلوں کو چھولیا ہے۔
ویڈیو میں دیکھا جاسکتا ہے کہ دو ننھے ننھے طوطے ایک پنجرے میں قید ہیں، کافی کوشش کے بعد ایک طوطا پنجرے سے نکلنے میں کامیاب ہوجاتا ہے اور تھوڑی سی پرواز کے بعد واپس آکر اپنے ساتھی کے باہر نکلنے کا انتظار کرتا ہے اور کافی جدوجہد کے بعد دوسرے ساتھی کے آزاد ہونے پر دونوں اکٹھے اڑ جاتے ہیں۔
پنجرے سے فرار کی اس خوبصورت ویڈیو میں ایک دوسرے کی مدد کے جذبے اور وفاداری کو دیکھ کر سوشل میڈیا صارفین نے بھرپور خوشی کا اظہار کیا ہے اور طوطوں کی اس دوستی کو ایک خوبصورت مثال قرار دیا ہے۔یاد رہے کہ آج بھی معاشرے میں وفاداری نبھانے کے حوالے سے ہمیشہ جانور کی مثال دی جاتی ہے۔
ایک واقعہ ہے کہ ایک بوڑھا اور نوجوان شیر آپس میں دوست ہوتے ہیں، دونوں میں کسی بات پر ناراضگی ہوجاتی ہے تو ایک بار بوڑھے اور لاغر شیر کو کچھ جنگلی جانور پریشان کرتے ہیں اتنے میں نوجوان شیر آتا ہے اور دھاڑ کر جانوروں کو بھگادیتا ہے۔
بوڑھا شیر حیران ہوکر پوچھتا ہے کہ ہماری تو ناراضگی تھی پھر تم نے میری مدد کیوں کی تو نوجوان کہتا ہے کہ ہمارے اختلاف چاہے کتنے بھی ہوں لیکن کسی دوسرے کو مداخلت کی اجازت نہیں دی جاسکتی۔
دوسری طرف اگر ہم اپنے معاشرے کو دیکھیں تو ہر طرف نفسا نفسی اور کھینچا تانی کا ماحول ہے لیکن اگر ہم ان معصوم پرندوں کی طرح ایک دوسرے کی مدد کا جذبہ پیدا کریں۔
ٹانگیں کھینچے کے بجائے ایک دوسرے کا ہاتھ تھامنے کی کوشش کریں تو ہمارا معاشرے ضرور مسائل کی دلدل سے نکل کر ترقی کی طرف گامزن ہوسکتا ہے۔