گذشتہ دنوں اٹلی میں کشتی الٹ کر ڈوبنے کا افسوسناک واقعہ پیش آیا تھا جس میں موجود چند پاکستانی بھی حادثے کا شکار ہوکر جاں بحق ہوگئے۔
حادثے میں انتقال کرنے والے پاکستانیوں میں پاکستانی خواتین ہاکی ٹیم کی کھلاڑی شاہدہ رضا بھی موجود تھیں جو جہاں فانی سے رخصت ہوگئیں۔
'ہماری ویب' ڈاٹ کام کے اس آرٹیکل میں آپ کو شاہدہ رضا سے متعلق بتائیں گے۔
شاہدہ رضا کا تعلق کوئٹہ کی ہزارہ برادری سے تھا۔ دیار غیر میں روزگار کی تلاش کرنے کے لیے غیر قانونی طور پر ترکی جانے والی پاکستان خواتین ہاکی ٹیم کی سابق انٹر نیشنل مڈ فیلڈر شاہدہ رضا کشتی کے حادثے میں جاں بحق ہوگئی۔ شاہدہ رضا کو پیار سے 'چنٹو' پکارا جاتا تھا۔
وہ ہاکی کی کھلاڑی ہونے کے ساتھ ساتھ فٹ بال بھی کھیلتی تھیں۔ شاہد کے کوچ غلام عباس نے اس حوالے سے بتایا کہ ان کے اہلخانہ نےتصدیق کی ہےکہ شاہدہ رضا کا انتقال ہوگیا ہے۔وہ روزگار کیلئے بیرون ملک جانا چاہتی تھیں۔
وہیں دوسری جانب شاہدہ رضا سے متعلق سیکرٹری بلوچستان ہاکی کا کہنا تھا کہ شاہدہ رضا کی طلاق ہوچکی تھی جس کے بعد یورپ جانے کا فیصلہ کیا۔
یہاں قابل غور بات یہ بھی ہے کہ شاہدہ رضا کی والدہ کو ان کی موت کے خبر نہیں دی گئی ہے۔ ان کے رشتے داروں نے والدہ سے موت کی خبر نہ بتانے کا فیصلہ کیا ہے۔