اسلام آباد پولیس نے نیوزی لینڈ کرکٹ ٹیم کے دورہ پاکستان کے حوالے سے وزارت داخلہ سے وسائل فراہم کرنے کی درخواست کر دی۔سنیچر کو ترجمان اسلام آباد پولیس کی جانب سے جاری کیے گئے بیان کے مطابق ’وسائل کی فراہمی پر مہمان کرکٹ ٹیم کی سکیورٹی کے انتظامات کیے جائیں گے۔‘نیوزی لینڈ کرکٹ ٹیم پانچ ٹی20 انٹرنیشنل اور پانچ ون ڈے انٹرنیشنل میچز کے لیے پاکستان کے دورے پر آرہی ہے۔14 سے 17 اپریل کے دوران تین ٹی20 میچز لاہور میں کھیلے جائیں گے جبکہ آخری دو میچز 20 اور 24 اپریل کو راولپنڈی میں کھیلے جائیں گے۔ون ڈے سیریز کا آغاز 27 اپریل کو راولپنڈی میں ہو گا، جہاں 29 اپریل کو دوسرا میچ بھی کھیلا جائے گا۔ باقی تینوں میچز تین، پانچ اور سات مئی کو کراچی میں کھیلے جائیں گے۔پاکستان کرکٹ بورڈ (پی سی بی) نے چند روز قبل نیوزی لینڈ کے خلاف شروع ہونے والی ٹی20 اور ون ڈے ہوم سیریز کے لیے سکواڈ کا اعلان کیا تھا۔ نیوزی لینڈ کے خلاف سیریز کے لیے کپتان بابر اعظم کی ٹیم میں واپسی ہوئی ہے جبکہ ان کے ساتھ شاہین شاہ آفریدی، حارث رؤف، محمد رضوان اور فخر زمان بھی آرام کرنے کے بعد ٹیم میں واپس آگئے ہیں۔
نیوزی لینڈ کی ٹیم پانچ ٹی20 اور پانچ ون ڈے میچز کے لیے پاکستان آرہی ہے (فائل فوٹو: پی سی بی)
ٹی20 سکواڈ میں افغانستان کے خلاف ڈیبیو کرنے والے طیب طاہر اور وکٹ کیپر بیٹر اعظم خان کو ٹیم سے ڈراپ کر دیا گیا ہے تاہم آل راؤنڈر عماد وسیم ٹی20 سکواڈ میں اپنی جگہ برقرار رکھنے میں کامیاب رہے ہیں۔
افغانستان کے خلاف گذشتہ ماہ ڈیبیو کرنے والے زمان خان اور صائم ایوب کو ٹی20 جب کہ فاسٹ بولر احسان اللہ کو ٹی20 اور ون ڈے دونوں کے سکواڈ میں شامل کیا گیا ہے۔محمد وسیم اور عبداللہ شفیق ٹی20 کے بجائے صرف ون ڈے سکواڈ کا حصہ ہیں۔ون ڈے کے سکواڈ میں سلمان علی آغا، حارث سہیل اور امام الحق بھی شامل ہیں۔