آئی فون دنیا کا مقبول ترین موبائل فون ہی نہیں بلکہ اسٹیٹس سمبل بھی سمجھا جاتا ہے۔ گزشتہ روز پڑوسی ملک بھارت میں آئی فون بنانے والی کمپنی “ایپل“ نے اپنا اسٹور کھولا جس کے افتتاح کے لئے ایپل کے سی ای او ٹم کک خود فلمی شہر ممبئی پہنچے۔

وڑا پاؤ سے اچھا کچھ نہیں

اس موقع پر مشہور بھارتی اداکارہ مادھوری ڈکشٹ بھی اسٹور میں موجود تھیں۔ انھوں نے ٹم کک کی خاطر تواضع بھارت کے روایتی اسٹریٹ فوڈ یعنی وڑا پاؤ سے کی جس پر ٹم کک نے مادھوری کا شکریہ ادا کرتے ہوئے کہا کہ اس سے اچھا کچھ نہیں تھا۔

دوسرا اسٹور دہلی میں کھولا جائے گا

بی بی سی کے مطابق بھارت ایپل مصنوعات کی دوسری سب سے بڑی مارکیٹ ہے اور ٹم کک جمعرات کو دہلی میں ایک اور ایپل اسٹور کا افتتاح بھی کریں گے۔

ایپل اسٹور کی خصوصیات

اسٹور کے متعلق بنائے گئے وی لاگ میں دیکھا جاسکتا ہے کہ اسٹور کے انٹیرئیر پر کافی پیسہ خرچ کیا گیا ہے۔ دیواریں شیشے کی اور اسٹین لیس اسٹیل کا استعمال کیا گیا ہے۔ سورج کی روشنی براہ راست اسٹور میں داخل ہوسکتی ہے البتہ ماحول کو فرحت بخش احساس دینے کے لئے پودوں کا انتظام بھی کیا گیا ہے۔ وی لاگر کا کہنا ہے کہ اسٹور سے ایپل کی مصنوعات ایک ہی جگہ سے خریدنا ممکن ہوگا۔ یہاں کوئی ڈسکاؤنٹ نہیں ہے پھر بھی یہ ایپل مصنوعات خریدنے والوں کے لئے اچھا اضافہ ہے۔